బియ్యం రూ. 12 పెట్టి కొనాలి..

బుధవారం పాదయాత్రలో భాగంగా గుంతకల్లు పట్టణంలో షర్మిల నడుస్తుండగా మహిళలు షర్మిలకు ఎదురేగి తమ సమస్యలు విన్నవించుకున్నారు. వారి మధ్య సంభాషణ సాగిందిలా..
మహిళ: మాబోటి వాళ్లు ఎలా బతకాలమ్మా.. అన్ని ధరలూ పెరిగాయి. అధికారంలో ఉన్న వాళ్లని మేం తగ్గించాలని అడగడం లేదు. కానీ వాటిని పెంచేముందు ఒక్క క్షణం బీదోళ్లు ఎలా బతుకుతారని ఆలోచించాలి.

షర్మిల: కరెంటు ఉంటుందా?
కరెంట్ ఉండదు.. బిల్లయితే ఎక్కువగానే వస్తోంది. 
ఎన్ని సిలిండర్లు వాడుతారమ్మా మీరు..
మనుషులను బట్టి వాడకం ఉంటుంది. మాకు రెండు నెలలకు ఒకటి పడుతుంది. ఇప్పుడు ఆరే ఇస్తామంటున్నారు. అంతకంటే ఎక్కువ అవసరమైతే రూ. 900 పడొచ్చని అంటున్నారు.

రాజన్న ఉన్నప్పుడు ఎలా ఉంది గ్యాస్ పరిస్థితి?
అప్పుడు గ్యాస్ ధర పెరగలేదమ్మా. ఇప్పుడు అధికారంలో ఉన్నవాళ్లు మళ్లీ ఓట్లప్పుడు గానీ మా ముందుకు రారు. మీరొక్కరే మా వరకూ వచ్చారు. కనీ సం మాకు మంచినీళ్లు కూడా దొరకవు.

బియ్యం సరఫరా ఎలా ఉంది?
మరో మహిళ : మనిషికి నాలుగు కిలోలే ఇస్తున్నారు. అవి ఏమాత్రం? ఈ బియ్యం ఒక్క రూపాయికి కిలో అంటున్నారు. కానీ అవి అయిపోగానే మళ్లీ బియ్యం కొనాలంటే బయట రూ. 12 పెట్టి కొనాలి. మూడు పూటలా తినే పరిస్థితి లేదు.

ఇప్పుడు ఎవరి ప్రభుత్వం ఉంది?
కాంగ్రెస్ ప్రభుత్వం 
అంటే రాజన్నది కాదు 
కాదు మేడమ్

మీకు అర్థమవుతోందా చంద్రబాబు ఉన్నప్పుడు ఎలా ఉండేదో, రాజన్న ఉన్నప్పుడు ఎలా ఉండేదో, ఈ కాంగ్రెస్ ప్రభుత్వంలో ఎలా ఉందో! రాజన్న చేసిన పనులన్నీ మళ్లీ ఆయన కొడుకుగా జగనన్న చేస్తాడు. మళ్లీ మంచిరోజులొస్తాయమ్మా.. ధైర్యంగా ఉండు.

రాష్ట్రీయం రేపట్నుంచి కర్నూలు జిల్లాలో షర్మిల యాత్ర

వైఎస్సార్ కాంగ్రెస్ పార్టీ అధినేత వైఎస్ జగన్‌మోహన్‌రెడ్డి తరఫున ఆయన సోదరి షర్మిల చేపట్టిన పాదయాత్ర గురువారం అనంతపురం జిల్లాలో పూర్తయి.. కర్నూలు జిల్లాలోకి ప్రవేశించనుంది. పత్తికొండ నియోజకవర్గం మద్దికెర గ్రామం వద్ద కర్నూలు జిల్లాలోకి యాత్ర ప్రవేశిస్తుందని పాదయాత్ర సమన్వయకర్తలు తలశిల రఘురామ్, ఆళ్ల రామకృష్ణారెడ్డి, దేవిరెడ్డి శివశంకర్‌రెడ్డి మంగళవారం కొనకొండ్లలో తెలిపారు. కర్నూలు జిల్లాలో 8 నియోజకవర్గాల్లో 15 రోజులపాటు 200 కిలోమీటర్లకుపైగా పాదయాత్ర కొనసాగుతుందని అన్నారు.

రాజన్న ఉంటే 9 గంటల కరెంటొచ్చేది.....

- 30 కిలోల బియ్యం వచ్చేవి: షర్మిల
- ఈ ప్రభుత్వం 2 గంటల కరెంటు కూడా ఇవ్వకుండా కష్టాలు పెడుతోంది రూపాయికే కిలో బియ్యం అంటూ గారడీ చేస్తోంది
- రూ.20కి 20 కిలోలిచ్చి.. మిగతా 10 కిలోలు రూ.10 చొప్పున కొనుక్కోమంటోంది
- వడ్డీ లేని రుణం ఒక బూటకం.. సీఎం 15 లక్షల ఉద్యోగాలన్నారు.. ఎక్కడ?
- ఈ ప్రభుత్వం వైఎస్ పథకాలను తుంగలో తొక్కింది... ఆయనకు వెన్నుపోటు పొడిచింది
- ఇలాంటి ప్రభుత్వంపై అవిశ్వాసం పెట్టకుండా చంద్రబాబు దానితోనే కుమ్మక్కయ్యారు
- షర్మిల ‘మరో ప్రజాప్రస్థానం’: మంగళవారం యాత్ర ముగిసేనాటికి.. రోజులు: 20, కిలోమీటర్లు: 258.80

‘‘రాజశేఖరరెడ్డి మంచి మనసును మీరు(ప్రజలు) చూసి, పనితీరు గమనించి మళ్లీ ఆయనే సీఎం కావాలని ఆశీర్వదించారు. అప్పుడు వైఎస్ రెండే వాగ్దానాలు చేశారు. వ్యవసాయానికి 9 గంటలు ఉచిత కరెంటు ఇస్తామని, కుటుంబానికి రూ.2కు కిలో చొప్పున 30 కిలోల బియ్యం ఇస్తామని వాగ్దానం చేశారు. రాజన్న బతికి ఉంటే ఈ రెండు హామీలూ అమలయ్యేవి. ఇప్పుడు ఈ ప్రభుత్వం కనీసం 2 గంటలు కూడా కరెంటు ఇవ్వకుండా కష్టాలు పెడుతోంది. కొనాల్సిన సమయానికి కరెంటు కొనుగోలు చేయకుండా విద్యుత్ సంక్షోభానికి కారణమైంది. మరోవైపు కిలో బియ్యం రూపాయికే అంటూ గారడీ చేస్తోంది. రూ.20కు 20 కిలోలు ఇచ్చి.. మిగిలిన 10 కిలోలు.. కిలో రూ.10 చొప్పున కొనుక్కోమంటోంది. అంటే 30 కిలోలకు 120 అవుతోంది. అదీ గారడీ అంటే. రాజన్న ఉంటే రూ.60కే 30 కిలోలు వచ్చేవి..’’ అని వైఎస్సార్ సీపీ అధ్యక్షుడు వైఎస్ జగన్‌మోహన్‌రెడ్డి సోదరి షర్మిల కాంగ్రెస్ ప్రభుత్వాన్ని తూర్పారబట్టారు.

ప్రజా సమస్యలు పట్టని ప్రభుత్వ వైఖరికి, దానితో అంటకాగుతున్న టీడీపీ వైఖరికి నిరసనగా చేపట్టిన ‘మరో ప్రజాప్రస్థానం’ పాదయాత్ర 20వ రోజు మంగళవారం అనంతపురం జిల్లా ఉరవకొండ నియోజకవర్గంలో పలుచోట్ల ఆమె పర్యటించారు. కొనకొండ్లలో జరిగిన బహిరంగ సభలో మాట్లాడుతూ పై వ్యాఖ్యలు చేశారు.
అవిశ్వాసం ఎందుకు పెట్టరు?: ‘‘చంద్రబాబు పిల్లనిచ్చిన మామకు వెన్నుపోటు పొడవడమేకాదు.. ఎన్టీఆర్ వాగ్దానాలైన రూ. 2 కిలో బియ్యం పథకం, సంపూర్ణ మద్యపాన నిషేధాన్ని తుంగలో తొక్కారు. ఇప్పుడు పాదయాత్ర అంటూ కొత్త నాటకం ఆడుతున్నారు. అసలు ఆయనకు పాదయాత్ర చేయాల్సిన అవసరమే లేదు. ఈ అసమర్థ ప్రభుత్వాన్ని దించేందుకు కావాల్సినంత మంది ఎమ్మెల్యేలు ఆ పార్టీకి ఉన్నారు. కానీ అవిశ్వాస తీర్మానం పెట్టకుండా దానితోనే కుమ్మక్కయ్యారు’’ అని షర్మిల విమర్శించారు.

‘‘చంద్రబాబు హయాంలో గ్యాస్ ధర రూ. 145 నుంచి రూ. 305కు పెరిగింది. కానీ వైఎస్ ఐదేళ్లలో రూ.305కు పైన ఒక్క రూపాయీ పెంచలేదు. ఇప్పుడు 6 సిలిండర్లు దాటితే రూ. 1,000కు కొనుక్కోవాలట. అంటే నెలకు ఒకటి చొప్పున వాడే కుటుంబం ఒక్కో సిలిండర్‌కు సగటున రూ. 950 వెచ్చించాల్సి వస్తుంది. రూ.305 ఎక్కడ? రూ.950 ఎక్కడ?..’’ అని ఆమె మండిపడ్డారు.

15 లక్షల ఉద్యోగాలేవో చెప్పండి: ‘‘కిరణ్‌కుమార్‌రెడ్డి 15 లక్షల ఉద్యోగాలు ఇస్తానని చెప్పారు. కనీసం వాటిలో 10 శాతం ఉద్యోగాలు ఎక్కడ ఇచ్చారో వివరాలు చెప్పమంటే బయటికి చెప్పరు. వడ్డీ లేని రుణాలని ఈ ముఖ్యమంత్రి చెబుతున్నారు. కానీ ఇదొక బూటకం. ఈ సర్కారులో పెట్రోలు, డీజిల్, కరెంటు, నిత్యావసర వస్తువులు.. ఇలా అన్నింటి ధరలూ పెంచేశారు. కరెంటైతే రెండు మూడు గంటలు కూడా ఇవ్వరు కానీ, బిల్లులు చూస్తే షాక్ కొడుతోంది. సర్‌చార్జీలు అంటారు.. మరో చార్జీ అంటారు.. ఇంతలా వేధిస్తుంటే ప్రజలు ఎలా బతకాలి?’’ అని షర్మిల నిలదీశారు.

‘‘ఇంతకుముందు ఫోన్ చేసిన 20 నిమిషాలకే 108 వచ్చేది. ఎన్నో ప్రాణాలను నిలబెట్టింది. ఇప్పుడు 108 ఎక్కడా కనిపించడం లేదు. వైఎస్ చేసిన ప్రతి ప్రమాణాన్ని ఈ సర్కారు తుంగలో తొక్కింది. వైఎస్‌కు వెన్నుపోటు పొడిచింది. 30 ఏళ్లపాటు సేవచేస్తే, ప్రతి పథకానికి రాజీవ్ అనో, ఇందిర అనో పేరు పెడితే వాళ్లిచ్చిన బహుమానం ఎఫ్‌ఐఆర్‌లో ఆయన పేరును దోషిగా చేర్చడం’’ అని ఆవేదన వ్యక్తంచేశారు. వైఎస్ మరణాన్ని తట్టుకోలేక 668 మంది ప్రాణాలు కోల్పోయారని, వారి కుటుంబాలను ఓదార్చాలని ఈ కాంగ్రెస్‌కు అనిపించలేదన్నారు. ‘‘చనిపోయిన వారు కాంగ్రెస్ వాళ్లే కదా. కాంగ్రెస్‌కు ఓటేసిన వారే కదా. కానీ ఆ పార్టీ నేతలకు వారిని ఆదుకోవాలని అనిపించలేదు. ఒక్క జగనన్నే వారిని ఓదార్చేందుకు బయలుదేరాడు. అందుకు కక్ష కట్టి నీచమైన కుట్రకు దిగారు..’’ అని షర్మిల ధ్వజమెత్తారు.

15 నెలలుగా పెన్షన్ లేదమ్మా..

పాదయాత్రలో భాగంగా గూళ్యపాలెంలో షర్మిల స్థానికులతో మాట్లాడారు. ఈ సందర్భంగా అక్కడ ఉన్న ప్రతి ఒక్కరూ తమ సమస్యలు విన్నవించారు. ఈ ప్రభుత్వ వైఖరితో విసిగిపోయామన్నారు. ఆల్లె బాషా అనే వికలాంగుడికి 2011 జులై వరకు పెన్షన్ వచ్చిందని, కానీ 15 నెలలుగా పెన్షన్ రాలేదని ఆయన భార్య మొరపెట్టుకున్నారు. పెన్షన్‌కు సంబంధించిన ఖాతా పుస్తకం చూపించి.. తమకు పెన్షనే ఎంతో కొంత ఆధారమని, వచ్చేలా చూడాలని వేడుకున్నారు. ఓ విద్యార్థి మాట్లాడుతూ ‘గ్యాస్ ధర పెరిగిందని హాస్టల్లో మెనూ తగ్గించారు. జైల్లో ఖైదీకి రూ. 40 వెచ్చిస్తే.. మాకు రోజుకు రూ. 17 మెస్ చార్జీగా ఇస్తున్నారు. రాజన్న రాజ్యం రావాలి. మళ్లీ మాకు జగనన్న సీఎం కావాలి..’ అని అన్నారు. స్థానికులంతా తమకు నీళ్లు రావడం లేదని, కరెంటు ఉండడం లేదని, పావలా వడ్డీ కింద రుణాలు రావడం లేదని ఫిర్యాదు చేశారు.

ఇందిరమ్మ ఇల్లు మధ్యలో ఆగిపోయి బిల్లులు రాలేదని వాపోయారు. ఓ రైతు మాట్లాడుతూ ‘అదనులో విత్తనాలు సరఫరా చేయకుండా ఈప్రభుత్వం రైతులను దెబ్బతీస్తోంది. సబ్సిడీ విత్తనాలను దళారులు చేజిక్కించుకుని అమ్ముకుంటున్నారు. వైఎస్ ఉన్నప్పుడు గ్రామం యూనిట్‌గా ఇన్సూరెన్స్ ఇస్తే.. ఈ ప్రభుత్వం దాన్ని రద్దు చేసింది..’ అని పేర్కొన్నారు. ఓ విద్యార్థి మాట్లాడుతూ ‘మాకు ఉచిత బస్ పాస్ ఇవ్వడం లేదు..’ అని ఫిర్యాదు చేశారు. మరో విద్యార్థి ప్రభుత్వ పాఠశాలలో కూడా ప్రతి పరీక్షకు ఫీజులు వసూలు చేస్తున్నారని ఫిర్యాదు చేయగా.. షర్మిల స్పందిస్తూ ‘ఇది రాబందుల రాజ్యం అనడానికి చక్కటి నిదర్శనం. ప్రభుత్వ పాఠశాలల్లో కూడా ఫీజులు వసూలు చేస్తారు. కరెంటు ఇవ్వరు. గ్యాస్ ఇవ్వరు. రుణాలు ఇవ్వరు. ఉన్న పెన్షన్లు తీసేస్తారు. సమయం వచ్చినప్పుడు ఈ కాంగ్రెస్, టీడీపీలకు బుద్ధి చెప్పండి. జగనన్న వచ్చాక రాజన్న కన్న ప్రతి కలనూ నెరవేరుస్తాడు. మీ కష్టాలన్నీ తీరుస్తాడు’ అని భరోసా ఇచ్చారు.

గుంతకల్లు నియోజకవర్గంలోకి..: 20వ రోజు పాదయాత్ర మంగళవారం ఉదయం 11 గంటలకు వజ్రకరూర్‌లో ప్రారంభమై కమలపాడు, గూళ్యపాలెం, కొనకొండ్ల మీదుగా గుంతకల్లు నియోజకవర్గంలోకి ప్రవేశించింది. కొనకొండ్ల వద్ద కర్నూలు జిల్లా మంత్రాలయం ఎమ్మెల్యే బాలనాగిరెడ్డి(టీడీపీ), గుంతకల్లు నియోజకవర్గ వైఎస్సార్ సీపీ ఇన్‌చార్జి వెంకట్రామిరెడ్డి, మాజీ ఎమ్మెల్యే సాయిప్రసాద్‌రెడ్డి షర్మిలకు ఘనస్వాగతం పలికారు. అక్కడ జరిగిన బహిరంగ సభలో మాట్లాడాక.. గుంతకల్లు సమీపంలో ఏర్పాటుచేసిన రాత్రి బసకు షర్మిల 7.40కి చేరుకున్నారు. 20వ రోజు పాదయాత్రలో 12 కిలోమీటర్లు నడిచారు. ఇప్పటివరకు మొత్తం 258.80 కిలోమీటర్ల పాదయాత్ర పూర్తయింది. యాత్రలో ఎమ్మెల్యేలు కాపు రాంచంద్రారెడ్డి, గురునాథరెడ్డి, ఎన్.ప్రసన్నకుమార్‌రెడ్డి, నేతలు తోపుదుర్తి కవిత, పార్టీ జిల్లా కన్వీనర్ శంకరనారాయణ, ఉరవకొండ నియోజకవర్గ ఇన్‌చార్జి వై.విశ్వేశ్వర్‌రెడ్డి, కిసాన్‌సెల్ కోఆర్డినేటర్ వై.మధుసూదన్‌రెడ్డి తదితరులు పాల్గొన్నారు.

మీ మీద నమ్మకం లేకే.. (19Thday)

అధికారం ఉంటే సరిపోదు.. చిత్తశుద్ధి, విశ్వసనీయత ఉండాలి
* మేం అధికారంలోకి వస్తే చేస్తామనే ప్రజల నమ్మకం
* తన పాలన మళ్లీ తెస్తానని చెప్పే ధైర్యం చంద్రబాబుకు లేదు
* అందుకే వైఎస్ చేసినట్లే తానూ చేస్తానని హామీలిస్తున్నారు
* బాబుగారూ మీకూ, మీ పార్టీకి చిత్తశుద్ధి ఉంటే.. అవిశ్వాసం పెట్టరేం?

షర్మిల ‘మరో ప్రజాప్రస్థానం’ సోమవారం యాత్ర ముగిసేనాటికి..
రోజులు: 19,
కిలోమీటర్లు: 246.80

‘మరో ప్రజాప్రస్థానం’ నుంచి ‘న్యూస్‌లైన్’ ప్రత్యేక ప్రతినిధి: ముఖ్యమంత్రి కిరణ్‌కుమార్‌రెడ్డి తమ సమస్యలు పరిష్కరిస్తాడన్న నమ్మకం ప్రజలకు ఏ కోశానా లేదని వైఎస్సార్ సీపీ అధ్యక్షుడు వైఎస్ జగన్‌మోహన్‌రెడ్డి చెల్లెలు షర్మిల అన్నారు. అందుకే తమ సమస్యలు పరిష్కరించాలని ఆయనకు కాకుండా వారు తమకు వినతిపత్రాలు ఇస్తున్నారని చెప్పారు. ‘మరో ప్రజాప్రస్థానం’ పాదయాత్ర 19వ రోజు సోమవారం అనంతపురం జిల్లా ఉరవకొండ నియోజకవర్గంలోని వజ్రకరూర్‌లో ఆమె ప్రసంగించారు. ప్రజా సమస్యలు పట్టని ప్రభుత్వ వైఖరికి, దానికి వంతపాడుతున్న ప్రతిపక్ష టీడీపీ వైఖరికి నిరసనగా వైఎస్ జగన్‌మోహన్‌రెడ్డి తరఫున చేపట్టిన పాదయాత్రలో అడుగడుగునా తమకు ప్రజలు వినతిపత్రాలు ఇవ్వడంపై మాట్లాడారు.

రాష్ట్రీయం రాజన్న దిక్కు లేక దిక్కులేనివాళ్లమయ్యాం

* మరో ప్రజాప్రస్థానంలో షర్మిలతో గొర్రెలు, మేకల పెంపకందార్ల ఆవేదన
* వైఎస్ తెచ్చిన గొర్రెలు, మేకల పెంపకందారుల సమాఖ్య ఆయనతోనే పోయింది
* రుణాలు ఇవ్వరు.. గొర్రెలు చస్తే పరిహారం కూడా రావడం లేదని వెల్లడి
* జగనన్న సీఎం కాగానే రాజన్న రాజ్యం వస్తుంది: షర్మిల
* అప్పుడు బీమా అందుతుందని, రుణాలు ఇస్తారని, కార్పొరేషన్ బాగా పనిచేసేలా అన్న చూస్తాడని భరోసా

షర్మిల ‘మరో ప్రజాప్రస్థానం’
ఆదివారం యాత్ర ముగిసేనాటికి..
రోజులు: 18, కిలోమీటర్లు: 236.10

ప్రజల బాధలు పట్టని ప్రభుత్వ వైఖరికి.. దానికి మద్దతుగా ఉన్న టీడీపీ కుమ్మక్కు రాజకీయాలకు నిరసనగా వైఎస్సార్ కాంగ్రెస్ పార్టీ అధ్యక్షుడు వై.ఎస్.జగన్‌మోహన్‌రెడ్డి తరఫున ఆయన చెల్లెలు షర్మిల చేపట్టిన ‘మరో ప్రజాప్రస్థానం’ పాదయాత్ర ఆదివారం 18వ రోజు ఉరవకొండ నియోజకవర్గంలో సాగింది. పాదయాత్రలో ప్రజల సమస్యలను ఆమె తెలుసుకున్నారు. ఉదయం ఉరవకొండ మార్కెట్ యార్డులో బయలుదేరిన షర్మిలకు మార్గమధ్యంలో చిన్నహోతూరుకు చెందిన గొర్రెల కాపరి సురేష్ ఎదురయ్యాడు. షర్మిలతో తన గోడును వెళ్లబోసుకున్నాడు.

‘‘రాజన్న లేడు. మేం దిక్కులేనివాళ్లమయ్యాం. ఆయన తెచ్చిన గొర్రెలు మేకల పెంపకందారుల సమాఖ్య
ఆయనతోనే పోయింది. రుణాలు లేవు. గొర్రెలు చస్తే బీమా రాదు. మమ్మల్ని పట్టించుకునేవాళ్లే లేరు’’
- మరో ప్రజాప్రస్థానంలో షర్మిలతో గొర్రెలు, మేకల పెంపకందారుల ఆవేదన ఇది..

షర్మిల: ఏమన్నా బాగున్నారా?
సురేష్: గొర్రెలు చనిపోతే బీమా రావడం లేదమ్మా. ఇంతకుముందు గొర్రెకు రూ.18 కడితే.. చనిపోయినప్పుడు రూ.1,000 వచ్చేవి. ఇప్పుడు రావడం లేదు.

షర్మిల: ఏవైనా రోగాలు వచ్చినప్పుడు వాటికి మందులు, చికిత్స అందుబాటులో ఉంటుందా?
సురేష్: ఎక్కువగా కుంటు వ్యాధి వస్తుంది. ఇంతకుముందు మందుల సరఫరా బాగుండేది. ఇప్పుడు మందులు దొరకడం లేదు.

షర్మిల: రుణాలు ఇస్తున్నారా?
సురేష్: రాజశేఖరరెడ్డి ఉన్నప్పుడు మాకు కార్పొరేషన్(గొర్రెలు, మేకల పెంపకందారుల సమాఖ్య) ఉండేది. దాని ద్వారా రుణాలు ఇచ్చేవారు. కానీ ఇప్పుడు రాజశేఖరరెడ్డి లేరు. ఆ కార్పొరేషనూ లేదు.

వై.మధుసూదన్‌రెడ్డి(కిసాన్‌సెల్ కో ఆర్డినేటర్): కార్పొరేషన్‌కు పాలకమండలి లేదు. చైర్మన్, మెంబర్ పోస్టులు ఖాళీగా ఉన్నాయి.
షర్మిల: అంటే ఇప్పుడు కార్పొరేషన్ డెడ్ అయినట్టే.

షర్మిల: చంద్రబాబు హయాంలో ఎలా ఉండేది?
సురేష్: ఆయన టైమ్‌లో కార్పొరేషన్ లేదు. ఏ పని కోసం మండలం వెళ్లినా రూ.100-200 లంచం ఇవ్వాల్సిందే.

షర్మిల: మీ మేలు కోరి రాజన్న కార్పొరేషన్‌ను సృష్టిస్తే.. ఇప్పుడు దాన్ని పనిచేయకుండా చేశారు. మళ్లీ చంద్రబాబు పాలన కనిపిస్తోంది. అప్పుడు బీమా వచ్చింది. ఇప్పుడు రావట్లేదు.

సురేష్: అసలు మమ్మల్ని పట్టించుకునే వాళ్లే లేరు.

షర్మిల: ముఖ్యమంత్రి కిరణ్‌కుమార్‌రెడ్డికి ఢిల్లీ పోవడానికే సరిపోతోంది. ఇక మీ గురించి ఆయనేం పట్టించుకుంటారు? వ్యవసాయం బాగాలేనప్పుడు రైతులు ప్రత్యామ్నాయ ఆదాయం పొందాలని రాజన్న పశువుల పెంపకం కోసం లోన్లు ఇచ్చాడు. గొర్రెలు, మేకల పెంపకం దారులకు బీమా వసతి కల్పించాడు. కానీ ఈ ప్రభుత్వానికి అంతటి పెద్ద మనసేది?

సురేష్: వర్షం వచ్చి10 జీవాలు చనిపోతే.. రూపాయి రాలేదు. అధికారులు తిప్పించుకుంటున్నారు.

షర్మిల: యథారాజా తథాప్రజా అంటారు కదా. కిరణ్‌కుమార్‌రెడ్డి లాగానే అధికారులు కూడా ఉన్నారు. జగనన్న సీఎం కాగానే మళ్లీ రాజన్న రాజ్యం వస్తుంది. అప్పుడు బీమా అందుతుంది. పశుగ్రాసం, నీటికి కొదవుండదు. వైద్యం కోసం సంచార వైద్యశాలలు అందుబాటులోకి తెస్తాడు. రుణాలూ ఇస్తాడు. కార్పొరేషన్ బాగా పనిచేసేలా చూస్తాడు. ధైర్యంగా ఉండండన్నా..

పిల్లల పొట్ట మీద కొడతారా?
పాదయాత్రలో భాగంగా షర్మిల రాగులపాడులోని గిరిజన బాలుర సంక్షేమ వసతి గృహాన్ని సందర్శించారు. గ్యాస్ ధర పెరిగిందని తమకు మెనూ మార్చేశారని, ఇంతకుముందు వారానికి 6 గుడ్లు, 6 అరటిపండ్లు ఇస్తే.. ఇప్పుడు మళ్లీ 3 గుడ్లు, 3 అరటి పండ్లు ఇస్తున్నారని పిల్లలు తెలిపారు. వాళ్ల సమస్యలను విన్న షర్మిల చలించిపోయారు.

షర్మిల: మీ హాస్టల్లో ఏవైనా సమస్యలు ఉన్నాయా?
విద్యార్థి: మాకు భోజనం సరిగ్గా అందడం లేదు. అలాగే పుస్తకాలు, సబ్బులు సరిగ్గా అందవు. ఆటలు ఆడించడం లేదు. కరెంటు కోతలతో చదువు సాగడం లేదు.

షర్మిల: భోజనం పరిస్థితి ఏంటి?
విద్యార్థి: అన్నం, సాంబారు బాగుండదు. ఇంతకుముందు 6 గుడ్లు, 6 అరటిపండ్లు ఇచ్చేవారు. ఇప్పుడు మూడు చొప్పున ఇస్తున్నారు. అడిగితే గ్యాస్ ధర పెరిగిందంటున్నారు.

షర్మిల: (వంటమనిషితో) గ్యాస్‌కు, గుడ్డుకు సంబంధం ఏంటి?
శ్రీనివాస్(వంటమనిషి): గ్యాస్ ధర పెరిగిందని, ఖర్చు పెరిగిందని మెనూలో తగ్గించారమ్మా..
షర్మిల: గ్యాస్ ధర పెంచడమే కాక.. పిల్లల పొట్టపై కొడతారా? ఇదెక్కడి న్యాయం? అన్నం సాంబారు బాగుండడం లేదంట?

శ్రీనివాస్: బాగానే వండుతున్నామమ్మా..

షర్మిల: కిచెన్‌లో చూద్దామా?..
షర్మిల వంట గదిలోకి వెళ్లారు. అక్కడ చిమ్మ చీకటి. లైట్లు లేవు. టార్చ్ వెలుగులో అన్నం చూసిన షర్మిల చలించిపోయారు. అన్నం పసుపు, గోధుమ వర్ణంలో ఉండడాన్ని ప్రశ్నించారు. బోరు నీళ్ల వల్ల ఇలా రంగు మారుతోందని వంట మనిషి చెప్పుకొచ్చారు. ముద్దముద్దగా ఉన్న ఆ అన్నం రుచి చూసిన షర్మిల తీవ్రంగా కలత చెందారు. ఇంత ఘోరంగా ఎలా వండుతున్నారని ప్రశ్నించారు. రాత్రి కోసం చేసిన సాంబారును, మధ్యాహ్నం మిగిలిన సాంబారును రుచి చూశారు. 2 లీటర్ల పెరుగులో రెండు బిందెల నీళ్లు పోస్తారని విద్యార్థులు చెప్పడంతో ఆ మజ్జిగను కూడా తాగి చూశారు. విద్యార్థుల తిండి విషయంలో పడుతున్న కష్టాన్ని చూసి వారిని అక్కున చేర్చుకున్నారు.

వెంటనే బోరు వేయించండి:
ఇక్కడికి అరకిలోమీటరు దూరంలో ఉన్న స్కూల్‌లో బోరింగ్ లేదని, తాగునీటికి ఇబ్బంది ఉందని, బాత్‌రూమ్‌లు పనిచేయడం లేదని విద్యార్థులు ఆవేదన వ్యక్తంచేయడంతో వెంటనే నియోజకవర్గ ఇన్‌చార్జి వై.విశ్వేశ్వర్‌రెడ్డికి బోరు వేయించడం, బాత్‌రూమ్‌లు బాగుచేయించడం, లైట్లు వేయించడం వంటి తక్షణ అవసరాలను తీర్చాలని షర్మిల సూచించారు. అయితే, స్కూల్‌లో బోరింగ్ వేయిస్తామని ఇదివరకు చాలా మంది చెప్పారని, కానీ ఎవరూ వేయించలేదని విద్యార్థులు చెప్పడంతో ‘ఇది జగనన్న పార్టీ. కచ్చితంగా మీకు బోరింగ్, బాత్‌రూమ్, లైట్ల సమస్య తీరుతుంది’ అని ఆమె భరోసా ఇచ్చారు. ‘జగనన్న ఎప్పుడు బయటికొస్తాడక్కా.. ’ అని ఓ విద్యార్థి అడగడంతో ‘వస్తాడు చిన్నా. దేవుడున్నాడు కదా.. తప్పకుండా తీసుకొస్తాడు. మీ సమస్యలన్నీ తీరుస్తాడు..’ అంటూ ముందుకు కదిలారు.

మాకిక ఆత్మహత్యలే గతి..
మార్గమధ్యంలో పీసీపాపిలి వద్ద ఓ వేరుశనగ రైతు వర్షానికి వేరుశనగ చెట్లు కుళ్లిపోయాయంటూ షర్మిలకు వాటిని చూపి.. ఆవేదన వ్యక్తం చేశాడు.

షర్మిల: ఏమైందన్నా పంటకు?
రైతు: 10 ఎకరాల్లో వేరుశనగ పంట వేశాం. వర్షానికి చెట్లు కుళ్లిపోయాయి. చెట్లు తీశాక కాయ పూర్తిగా నల్లబడి పనికిరాకుండాపోయింది. ఇది పూడ్చుకోలేని నష్టం.

షర్మిల: పరిహారం ఏమైనా వస్తుందా?
రైతు: రాజశేఖరరెడ్డి టైమ్‌లో బీమా వచ్చేది. అప్పుడు గ్రామాలను యూనిట్‌గా తీసుకునేవారు. ఇప్పుడు వాతావరణ బీమా అని, మండలాన్ని యూనిట్‌గా తీసుకుని ఇస్తామంటున్నారు. రెండేళ్లుగా బీమా రాలేదు. ఎకరాకు రూ.350 కట్టించుకుని రూ.650 ఇస్తారట. రాజశేఖరరెడ్డి టైమ్‌లో పంట ఉత్పత్తిలో కనీసం 70 శాతం వరకు బీమా వచ్చేది.

షర్మిల: రుణాలేమైనా అందుతున్నాయా?
రైతు: రుణాలా? వడ్డీలేని రుణాలని ప్రచారమే తప్ప ఇచ్చింది లేదు. ఇన్‌పుట్ సబ్సిడీ వస్తే రుణం కింద జమ చేసుకుంటున్నారు.

షర్మిల: పశుగ్రాసమైనా దక్కుతుందా?
రైతు: మొత్తం పంట కుళ్లిపోయిందమ్మా. పనికి రాదు. రైతు బతుకు ఇప్పుడు అధ్వానమైంది. మాకిక ఆత్మహత్యలే గతి.

షర్మిల: కరెంటు ఉంటోందా?
రైతు: రోజంతా కలిపి రెండు మూడు గంటలు ఇస్తున్నారు.

షర్మిల: రాబోయేది రైతు రాజ్యమే. రాజన్న రాజ్యమే. మీ ప్రతికష్టంలో జగనన్న మీకు తోడుంటాడు అని భరోసా ఇచ్చి ముందుకు కదిలారు.

బాబు అబద్ధాలు చెబుతున్నారు..
‘చంద్ర బాబు తాను గ్యాస్ ధర పెంచనే లేదని నిస్సిగ్గుగా అబద్ధాలు చెబుతున్నారు. రూ.145 ఉన్న గ్యాస్ ధరను రూ.305కు పెంచి.. ఇప్పుడు పెంచలేదంటున్నారు. గ్యాస్ ధర రూ.50 పెరిగినప్పుడు మహిళలకు కష్టం కాకూడదని ఆ రూ.50ను ప్రభుత్వమే భరించేలా రాజన్న చూశాడు. అప్పుడు ఆ రూ.50 సబ్సిడీ ఈ సీఎం కిరణ్‌కుమార్‌రెడ్డి, చంద్రబాబులు కూడా పొందారు.. కానీ ఇప్పుడు 6 సిలిండర్లే ఇస్తారట. అంతకుమించితే రూ.1,000కి కొనుగోలు చేయాలట.

అంటే నెలకు సగటున రూ.900 ఒక్కో సిలిండర్‌పై వెచ్చించాల్సి వస్తుంది’ అని రాగులపాడు సభలో మాట్లాడుతూ షర్మిల ఆవేదన వ్యక్తం చేశారు. ఆదివారం పాదయాత్ర ఉరవకొండ నుంచి రాగులపాడు వరకు 12.5 కిలోమీటర్ల మేర సాగింది. రాత్రి 7.35 గంటలకు రాగులపాడులో ఏర్పాటు చేసిన బసకు షర్మిల చేరుకున్నారు. పాదయాత్రలో వైఎస్సార్ సీపీ నేత కొండా సురేఖ, ఎమ్మెల్సీ డి.నారాయణరెడ్డి, ఎమ్మెల్యేలు గురునాథరెడ్డి, కాపు రాంచంద్రారెడ్డి, కె.శ్రీనివాసులు, పార్టీ సీజీసీ సభ్యురాలు తోపుదుర్తి కవిత, నేతలు వాసిరెడ్డి పద్మ తదితరులు పాల్గొన్నారు.

ప్రాణాలంటే లెక్కలేదు..

ఎర్రన్నాయుడు ప్రమాదానికి గురైతే 108కు 11 సార్లు ఫోన్ చేసినా పలకలేదట
మరో ప్రైవేటు అంబులెన్స్ వచ్చినా అందులో ఆక్సిజన్ లేక ఆయన మరణించారు
ప్రతి పథకాన్నీ ప్రభుత్వం నిర్వీర్యం చేస్తోంది.. అవిశ్వాసం పెట్టకుండా టీడీపీ చోద్యం చూస్తోంది
చంద్రబాబు హయాంలో నేతన్నలు మరణిస్తే పైసా సాయం చేయలేదు
వైఎస్ వచ్చాక వారి కుటుంబాలకు రూ.లక్షన్నర పరిహారం ఇచ్చారు
నేతన్నల కోసం బడ్జెట్‌లో వైఎస్ రూ. 312 కోట్లు పెడితే.. ఇప్పటికీ చెల్లించలేదీ ప్రభుత్వం
షర్మిల ‘మరో ప్రజాప్రస్థానం’ శనివారం యాత్ర ముగిసేనాటికి.. రోజులు: 17, కిలోమీటర్లు: 223.60


‘నిన్నటికి నిన్న ఎర్రన్నాయుడు ప్రమాదానికి గురైనప్పుడు 108కు 11 సార్లు ఫోన్ చేసినా పలకలేదట. మరో ప్రైవేటు అంబులెన్స్ వచ్చినా దాంట్లో ఆక్సిజన్ లేక ఆయన ప్రాణాలు కోల్పోయారు. ఆయనే కాదు. ప్రతి ప్రాణం ముఖ్యం. కానీ ఈ ప్రభుత్వానికి పట్టడం లేదు. ప్రతి పథకాన్నీ నిర్వీర్యం చేస్తోంది. నిలదీయాల్సిన ప్రధాన ప్రతిపక్షం చోద్యం చూస్తోంది. ఆ బాధ్యతను చంద్రబాబు విస్మరించారు. చంద్రబాబు నిద్రపోతుంటే.. కిరణ్‌కుమార్‌రెడ్డి మొద్దు నిద్రపోతున్నారు. ఇద్దరూ ఇద్దరే. జోడీ బాగా సరిపోయింది..’ అంటూ ముఖ్యమంత్రి, ప్రధాన ప్రతిపక్ష నేతలపై వైఎస్సార్ సీపీ అధ్యక్షుడు వైఎస్ జగన్‌మోహన్‌రెడ్డి చెల్లెలు షర్మిల నిప్పులు చెరిగారు. ‘మరో ప్రజాప్రస్థానం’ 17వ రోజు శనివారం పాదయాత్రలో భాగంగా అనంతపురం జిల్లా ఉరవకొండలో జరిగిన భారీ సభలో ఆమె ప్రసంగించారు.

షర్మిల పాదయాత్రకు బ్రహ్మరథం

వైఎస్ జగన్‌మోహన్‌రెడ్డి సోదరి షర్మిల పాదయాత్రకు ప్రజలు బ్రహ్మరథం పడుతున్నారని తిరుపతి ఎమ్మెల్యే భూమన కరుణాకర్‌రెడ్డి శుక్రవారం ఉరవకొండలో విలేకరులతో పేర్కొన్నారు. షర్మిల చేపట్టిన పాదయాత్ర అశేష జనస్పందనతో శుక్లపక్షం చంద్రునిలా దినదిన ప్రవర్ధమానమవుతోంటే.. టీడీపీ అధినేత చంద్రబాబు చేస్తో న్న పాదయాత్ర కృష్ణపక్షం చంద్రునిలా రోజురోజుకూ జనస్పందన కరువై నీరసించిపోతోందని ఆయన చెప్పారు. వర్షంలోనూ షర్మిలకు జనం బ్రహ్మరథం పడుతుండటం చూస్తోంటే మహానేత వైఎస్ రాజశేఖరరెడ్డి పాలన ఎంత జనరంజకంగా ఉండిందో.. వైఎస్ జగన్‌మోహన్‌రెడ్డి ఏ స్థాయిలో ప్రజాపోరాటాలు నిర్వహించారో.. వారిని జనం ఏ స్థాయిలో ఆదరిస్తున్నారో విశదం చేసుకోవచ్చన్నారు. వైఎస్ రెక్కల కష్టంపై అధికారంలోకి వచ్చిన కాంగ్రెస్ ప్రభుత్వం.. ఆయన ఇచ్చిన ఏ ఒక్క హామీని అమలు చేసిన దాఖలాలు లేవన్నారు. ప్రజలపై కక్ష సాధింపు చర్యలకు ప్రభుత్వం దిగుతోందన్నారు. ప్రజావ్యతిరేక కాంగ్రెస్ ప్రభుత్వాన్ని గద్దెదింపడమే లక్ష్యంగా.. కాంగ్రెస్, టీడీపీ కుమ్మక్కు రాజకీయాలను ఎండగట్టడం కోసం షర్మిల చేపట్టిన పాదయాత్ర అప్రతిహతంగా సాగుతోందన్నారు. ప్రజావంచక ప్రభుత్వాన్ని గద్దె దింపాల్సిన చంద్రబాబు.. పాదయాత్ర అంటూ ఎల్లోడ్రామాలు ఆడుతున్నారని విమర్శించారు. జగన్ ప్రజల్లో ఉంటే.. కాంగ్రెస్, టీడీపీలకు ఉనికి కూడా ఉండదనే భయంతోనే ఆయనపై అక్రమ కేసులు పెట్టి జైలు పాలు చేశారన్నారు. బెయిల్ రాకుండా రెండు పార్టీలు కుమ్మక్కై కుతంత్రాలు చేస్తున్నాయన్నారు. కాంగ్రెస్, టీడీపీల ఎత్తులను ప్రజలు తుత్తునీయలు చేసి.. జగన్‌మోహన్‌రెడ్డిని ముఖ్యమంత్రి పీఠంపై కూర్చోబెట్టడం ఖాయమని.. షర్మిల పాదయాత్రకు వస్తోన్న స్పందనను చూస్తే ఆ విషయం అవగతమవుతోందన్నారు.

వైఎస్ పోయాక బీమా ధీమా లేదు

రాజన్న ఉన్నప్పుడు విత్తనాలకు 50% సబ్సిడీ.. ఇప్పుడు తగ్గించేశారు
సకాలంలో సబ్సిడీ విత్తనాలూ అందక.. పంట ఖాళీగా వదిలేశాం
కరెంటు, నీళ్లు లేవు.. మమ్మల్ని పట్టించుకునే నాథుడే లేడంటూ ఆవేదన
ఈ ప్రభుత్వానికి ప్రజా సమస్యలే పట్టడం లేదని షర్మిల ధ్వజం
ఇలాంటి అసమర్థ సర్కారుపై అవిశ్వాసం పెట్టరేమని టీడీపీకి ప్రశ్న
జగనన్నను దీవిస్తే.. రాజన్న రాజ్యం మళ్లీ వస్తుందని ప్రజలకు భరోసా
షర్మిల ‘మరో ప్రజాప్రస్థానం’ శుక్రవారం యాత్ర ముగిసేనాటికి.. రోజులు: 16, కిలోమీటర్లు: 213.60

‘మరో ప్రజాప్రస్థానం’ నుంచి ‘న్యూస్‌లైన్’ ప్రత్యేక ప్రతినిధి:‘‘అప్పోసొప్పో చేసి పెట్టుబడి పెడుతున్నాం.. రాత్రనక, పగలనక కష్టపడుతున్నాం.. కానీ ఏం లాభం? సబ్సిడీ విత్తనాలు అందవు.. నీరుండదు.. కరెంటు ఉండదు.. వాన వచ్చో, వరదొచ్చో.. పంట నష్టపోతే వైఎస్ రాజశేఖరరెడ్డి ప్రభుత్వంలోలాగా బీమా అందదు.. మమ్మల్ని పట్టించుకునే నాథుడే లేడు’’.... వైఎస్సార్ కాంగ్రెస్ పార్టీ అధ్యక్షుడు వైఎస్ జగన్ చెల్లెలు షర్మిల చేపట్టిన పాదయాత్ర సాగే దారిలో ఏ రైతును కదిలించినా ఇదే ఆవేదన.. ఇదే బాధ! మహానేత మరణించాక తమ గోడు ఎవరికి చెప్పుకోవాలో తెలియట్లేదంటూ రైతులు కన్నీరు మున్నీరవుతున్నారు. ప్రజల బాధలు పట్టని ప్రభుత్వ వైఖరికి, దానికి మద్దతుగా నిలబడిన తెలుగుదేశం పార్టీ కుమ్మక్కు రాజకీయాలకు నిరసనగా జగన్ తరఫున షర్మిల చేపట్టిన ‘మరో ప్రజాప్రస్థానం’ పాదయాత్ర 16వ రోజు శుక్రవారం అనంతపురం జిల్లా ఉరవకొండ నియోజకవర్గంలో సాగింది. మార్గమధ్యంలో ఆమె పలుచోట్ల ప్రజల సమస్యలు తెలుసుకుని వారితో మాట్లాడారు. కోనాపురం సమీపంలో వేరుశనగ సాగు చేస్తున్న రైతు ల క్ష్మిని షర్మిల కలిసినప్పుడు వారి మధ్య సంభాషణ సాగిందిలా..

షర్మిల: ఏమ్మా పంటలెలా ఉన్నాయి?

లక్ష్మి: వేరుశనగ, అంతర పంటగా కంది వేయాలనుకున్నామమ్మా... కంది వేశాం కానీ సబ్సిడీ కింద ఇచ్చే వేరుశనగ విత్తనాలు మాత్రం సరైన సమయానికి అందలేదు. దాంతో కొంత ఖాళీగానే వదిలేశాం.. కంది మాత్రమే పెరుగుతోంది.

షర్మిల: మరి వేరుశనగ ఎన్ని ఎకరాల్లో వేశారు? పెట్టుబడి ఎంతైంది?
లక్ష్మి: 4 ఎకరాల్లో వేశాం. రూ.40 వేల ఖర్చయింది. కానీ చెట్టుకు కాయలే లేవు. ఇవి దేవాలయం
భూములు. గుత్త తీసుకున్నాం. పెట్టుబడి రాకున్నా.. గుత్త కట్టాల్సిందే.

కృష్ణమూర్తి(లక్ష్మి కుమారుడు): అంతకుముందు వేరుశనగ విత్తనాలకు 50 శాతం సబ్సిడీ ఉండేది. ఇప్పుడు తగ్గించారు. రూ. 300కు ఎకరాకు సరిపడా కంది విత్తనాలు వచ్చేవి. ఇప్పుడు రూ. 1,200 అయ్యింది. వేరుశనగకు 30 కిలోల మూటకు రూ.1,400కు పెరిగిపోయింది. పెట్టుబడులు బాగా పెరిగిపోయాయమ్మా!

షర్మిల: మరి పంటపోతే ఇన్సూరెన్స్ వస్తోందా?

లక్ష్మి: రాజశేఖరరెడ్డి ఉన్నప్పుడు రూ. 25 వేల పంటకు రూ. 12 వేలు ఇన్సూరెన్స్ వచ్చింది. రెండేళ్లుగా ఇన్సూరెన్స్ రావడం లేదు.

షర్మిల: ఇప్పుడు ఖర్చుపోయింది. పంట పోయింది. పరిహారమూ రాదా?

లక్ష్మి: వైఎస్ ఉన్నప్పుడు వచ్చింది. వానలు కూడా బాగా పడ్డాయి. ఇప్పుడు సహాయం చేసేవారే లే రు.

షర్మిల: రాజు మంచోడైతే దేవుడు కూడా దీవిస్తాడమ్మా. రుణాలు ఇస్తున్నారా?

లక్ష్మి: వడ్డీ లేని రుణం అంటున్నారు కానీ లెక్కేస్తే రూ. 3 వడ్డీ తేలుతోంది.

షర్మిల: చంద్రబాబు ఉన్నప్పటి పరిస్థితే ఇప్పుడూ దాపురించింది. అప్పుడు 4 వేల మంది రైతులు ఆత్మహత్యలు చేసుకున్నారు. ఇప్పుడు కూడా రైతుకు దిక్కులేకుండా పోయింది. జగనన్నను మీరు దీవిస్తే.. మళ్లీ రాజన్న రాజ్యం వస్తుంది.

తాగడానికి నీళ్లే లేవు

కోనాపురం రావడానికి ముందు షర్మిల పెన్న అహోబిలం వద్ద స్థానికులతో ముచ్చటించారు. వారి సమస్యలు తెలుసుకున్నారు. ఆ సంభాషణ సాగిందిలా..

షర్మిల: స్థానికంగా మీకేమైనా సమస్యలున్నాయా?

ఓ మహిళ : తాగడానికి నీళ్లే లేవమ్మా. కరెంటైతే రెండు గంటలు కూడా రావడం లేదు. పంటలు లేవు. బిల్లు కడితే కరెంటు ఇస్తామంటున్నారు.

షర్మిల: రాజన్న ఉన్నప్పుడు ఎలా ఉండేదమ్మా..

మహిళ: అప్పుడు 7 గంటల పాటు కరెంటు ఉండేది. అది కూడా ఉచితంగానే. బిల్లులేమీ అడగలేదు.

షర్మిల: గ్యాస్ వాడుతున్నారా అమ్మ మీరు..?

మహిళ: వాడుతున్నాం. రాజశేఖరరెడ్డి ఉన్నప్పుడు రూ. 320 ఉండేది. ఇప్పుడు రూ. 480 అంటున్నారు. కొద్దిగానే వాడుకోవాలట.

షర్మిల: ఊళ్లో అర్హులైన వారికి పెన్షన్లు అందుతున్నాయామ్మా..

మహిళ: వైఎస్ ఉన్నప్పుడు వచ్చినవారికి కూడా ఇప్పుడు తీసేస్తున్నారు.

షర్మిల: పావలా వడ్డీ కింద రుణాలు ఇస్తున్నారా?

మహిళ: ఇస్తాం.. అని బ్యాంకు చుట్టూ తిప్పించుకోవడమే గానీ ఇవ్వడం లేదు.

షర్మిల: ఉపాధి హామీ పనులు దొరుకుతున్నాయా?

మహిళ : వ్యవసాయం పనులూ లేవు. ఇటు కరువు పనులూ లేవు. 100 రోజుల పని ఇవ్వాల్సింది 30, 40 రోజులే దొరుకుతోంది.

షర్మిల: కూలీ ఎంత దొరుకుతోంది?

మహిళ: రూ. 50 నుంచి రూ. 70 వరకు. అంతకుముందు కన్నా ఇప్పుడు పని రెట్టింపైనా కూలీ మాత్రం సగమే ఇస్తున్నారు.

షర్మిల: రాజన్న ఉన్నప్పుడు ఎలా ఉంది?

మహిళ: అప్పుడు పని దొరికేది. కూలీ కూడా రూ. 100 నుంచి రూ. 120 దొరికేది.

షర్మిల: మీ అందరికీ అర్థమవుతోంది కదా. కాంగ్రెస్ ప్రభుత్వానికి, రాజశేఖరరెడ్డి ప్రభుత్వానికి ఎంత తేడా ఉందో? రాజన్న ఐదేళ్లు బాగా పనిచేశాడని మీరు మళ్లీ గెలిపించారు. కానీ కనీసం ఆయనను గౌరవిద్దామన్న ఆలోచన కూడా ఈ ప్రభుత్వానికి లేదు. రాజన్న రెండోసారి గెలవకముందు 9 గంటలు కరెంటు ఇస్తానన్నాడు. కానీ ఈ ప్రభుత్వం రెండు, మూడు గంటలే ఇస్తోంది. రాజన్న ఉచితంగా ఇస్తానన్నాడు. కానీ ఈ ప్రభుత్వం సర్‌చార్జీల పేరుతో బిల్లులు కట్టమంటోంది. ఇలాంటి ప్రభుత్వంపై అవిశ్వాసం పెట్టి నిలదీసే అవకాశమున్నా ప్రధాన ప్రతిపక్షం టీడీపీ అలా చేయట్లేదు.. ఎందుకంటే... ఆ పార్టీ ఆ సర్కారుతోనే కుమ్మక్కయ్యింది. ఈ ప్రభుత్వానికి, ప్రతిపక్ష టీడీపీకి సమయం వచ్చినప్పుడు గట్టిగా బుద్ధిచెప్పండి. జగనన్న ముఖ్యమంత్రి అయితే రాజన్న రాజ్యం మళ్లీ వస్తుంది. 9 గంటల కరెంటు వస్తుంది. నీళ్లొస్తాయి. వడ్డీ లేని రుణాలూ వస్తాయి.

పైన వర్షం.. కింద బురద..

శుక్రవారం ఉదయం 10.15 గంటలకు షర్మిల పాదయాత్ర ప్రారంభమైంది. పెన్న అహోబిలం మీదుగా మధ్యాహ్నం 12.15కు కోనాపురం క్రాస్‌రోడ్డుకు ఆమె చేరుకున్నారు. మధ్యాహ్న భోజనానికి అక్కడే విశ్రమించారు. 2 గంటల నుంచి వర్షం ఏకధాటిగా కురిసింది. వర్షంలోనే మధ్యాహ్నం 3 గంటలకు షర్మిల యాత్రకు తిరిగి బయలుదేరారు. కోనాపురం మీదుగా ఉరవకొండకు చేరుకునే దారి అది. కోనాపురం, షేక్షానిపల్లి మీదుగా దాదాపు 6 కిలోమీటర్లు మొత్తం అడుగు తీసి అడుగు వేయలేనంత బురదలోనే ఆమె పాదయాత్ర చేశారు. అంత వర్షంలోనూ కోనాపురం, షేక్షానిపల్లి ప్రజలు షర్మిలకు ఘనస్వాగతం పలికారు. షేక్షానిపల్లిలో షర్మిల మాట్లాడుతూ ‘వాన పడుతోంది కాబట్టి నాకు అర్థమైంది. ఈ రోడ్డుపై మీరు ఎన్ని కష్టాలు పడుతున్నారో.. జగనన్న సీఎం అయ్యాక మీకు రోడ్డు, బస్సులు వచ్చేలా చేస్తాం..’ అని హామీ ఇచ్చారు. సాయంత్రం 5.30కు లత్తవరం వద్ద రాత్రి బసకు చేరుకున్నారు. శుక్రవారం పాదయాత్రలో ఎమ్మెల్యేలు శోభానాగిరెడ్డి, గురునాథరెడ్డి, కాపు రాంచంద్రారెడ్డి, ఎన్టీఆర్ సతీమణి లక్ష్మీపార్వతి పాల్గొన్నారు. ఎమ్మెల్యే భూమన కరుణాకర్‌రెడ్డి, సీజీసీ సభ్యుడు వైవీ సుబ్బారెడ్డి కాసేపు నడిచారు. పార్టీ నేతలు రోజా, వాసిరెడ్డి పద్మ, ఉరవకొండ నియోజకవర్గ ఇన్‌చార్జి విశ్వేశ్వర్‌రెడ్డి, మాజీ ఎమ్మెల్యే ప్రసాదరాజు తదితరులు యాత్రలో పాల్గొన్నారు. శుక్రవారం మొత్తం 12.30 కిలోమీటర్ల పాదయాత్ర సాగింది.

జగన్ పోరాడుతున్నాడనే..

అందుకే జైల్లో పెట్టించారు

సీఎం కిరణ్ ప్రశ్నకు దీటుగా షర్మిల సమాధానం
పేదల గుండెల్లో జగన్ స్థానం సంపాదించుకున్నందుకే కుట్ర చేశారు
అన్న బయట ఉంటే మీకూ, టీడీపీకి ఉనికి ఉండదనే మీ భయం
జగన్ కాంగ్రెస్‌లోనే ఉంటే కష్టాలు ఉండేవి కావని కాంగ్రెస్ నాయకుడు ఆజాదే చెప్పారు
అంటే కావాలనే జైల్లో పెట్టారనే కదా?
జగన్ ఏ తప్పూ చేయలేదని ధైర్యంగా చెప్తున్నాం
షర్మిల ‘మరో ప్రజాప్రస్థానం’గురువారం యాత్ర ముగిసేనాటికి.. రోజులు: 15, కిలోమీటర్లు: 201.30

‘మరో ప్రజాప్రస్థానం’ నుంచి ‘న్యూస్‌లైన్’ ప్రత్యేక ప్రతినిధి: ‘జగన్ ఎవరి కోసం జైలుకెళ్లాడు? ప్రజల కోసమా? మహిళల కోసమా? రైతుల కోసమా? అని కిరణ్‌కుమార్‌రెడ్డి అంటున్నారు. ఆయనకు ఇదే నా సమాధానం. అవును.. జగనన్న రైతుల కోసం పోరాడారు. పేద ప్రజల కోసం పోరాడారు. విద్యార్థుల కోసం పోరాడారు. మహిళల కోసం పోరాడారు. చేనేత కార్మికుల కోసం పోరాడారు. అలా పోరాడడం వల్ల ప్రజల గుండెల్లో స్థానం సంపాదించుకుంటున్నాడనే మీరు జైలులో పెట్టారు. అలా పోరాడడం వల్ల మీకు, టీడీపీకి స్థానం ఉండదనే, ఉనికి కోల్పోతారనే మీరు జైలులో పెట్టారు. నీచమైన కుట్రకు పాల్పడ్డారు.

సీబీఐని వాడుకున్నారు. గుండెల మీద చేయి వేసుకుని మీరు నిజం చెప్పలేరు..’ అని వైఎస్సార్ కాంగ్రెస్ పార్టీ అధ్యక్షుడు వైఎస్ జగన్‌మోహన్‌రెడ్డి సోదరి షర్మిల.. ముఖ్యమంత్రి కిరణ్‌కుమార్‌రెడ్డిపై ధ్వజమెత్తారు. ప్రజా సంక్షేమాన్ని నిర్లక్ష్యం చేస్తున్న ప్రభుత్వ వైఖరికి, దానితోనే కుమ్మక్కయిన టీడీపీ వైఖరికి నిరసనగా చేపట్టిన ‘మరో ప్రజాప్రస్థానం’ 15వ రోజు గురువారం పాదయాత్రలో భాగంగా ఆమె అనంతపురం జిల్లా జల్లిపల్లిలో జరిగిన సభలో ఈ వ్యాఖ్యలు చేశారు. ‘కాంగ్రెస్ పార్టీ నాయకుడు ఆజాద్ పబ్లిక్ మీటింగ్‌లోనే చెప్పారు. జగన్ కాంగ్రెస్‌లోనే ఉంటే ఇన్ని కష్టాలు ఉండేవి కావని అన్నారు. అంటే దానర్థం ఏమిటి? కావాలనే జైలులో పెట్టారనే కదా? కావాలనే బెయిల్ రాకుండా చేస్తున్నారనే కదా దాని అర్థం. రాజన్న కుటుంబం ఈరోజు ఒక మాట చెబుతోంది. జగనన్న ఏ తప్పూ చేయలేదు. ఈ మాట ధైర్యంగా చెప్పగలుగుతున్నాం. ఒక రోజు వస్తుంది. ఆరోజు నిజం తెలుస్తుంది. ఆ రోజు జగనన్న తప్పకుండా బయటకు వస్తాడు. సమయం వచ్చినప్పుడు మీరంతా కాంగ్రెస్, టీడీపీలకు గట్టిగా బుద్ధి చెప్పాలి..’ అని షర్మిల ప్రజలకు పిలుపునిచ్చారు.

ఇది చేశానని చంద్రబాబు చెప్పలేరు..

‘చంద్రబాబు 9 ఏళ్లు అధికారంలో ఉన్నారు. ఉండి ఏం చేశారు? చేసింది చెప్పుకొనే ధైర్యం లేదు. ప్రజల కోసం ఫలానా మంచి పనిచేశానని చెప్పగలరా? కానీ ఇప్పుడు మళ్లీ అధికారం కావాలట. పాదయాత్రలంటూ కొత్త డ్రామా ఆడుతున్నారు. ప్రజలు అమాయకులేమీ కాదు. చంద్రబాబు అనుకుంటున్నట్టు పిచ్చివాళ్లేం కాదు. చంద్రబాబుకు లేనిది, రాజన్నకు ఉన్నదీ మాట మీద నిలబడే నైజం. చంద్రబాబుకు లేనిదీ, రాజన్న, జగనన్నలకు ఉన్నది విశ్వసనీయత. బాబుకు పాదయాత్ర అవసరం లేదు. ఈ అసమర్థ ప్రభుత్వాన్ని దించేందుకు తగినంత మంది ఎమ్మెల్యేలు ఉన్నారు. కానీ ఆయన అవిశ్వాసం పెట్టరట..’ అని షర్మిల.. చంద్రబాబుపై నిప్పులు చెరిగారు.


బీమా ఇవ్వడం లేదు..

ఉదయం 11.30కు ముద్దలాపురంలో శంకర్ అనే రైతుకు చెందిన వేరుశనగ చేనును షర్మిల పరిశీలించారు. చెట్లు తీశామని, కానీ చెట్టుకు రెండు మూడు కాయలే ఉన్నాయని ఆ రైతు వాపోయారు. ఎకరానికి 2 నుంచి 3 బస్తాలు కూడా వచ్చే పరిస్థితి లేదని వివరించారు. ‘వర్షాధారంగా ఈ పంట పండిస్తున్నాం. ఏటా పెట్టుబడులు నష్టపోతున్నాం. రాజశేఖరరెడ్డి హయాంలో 4 ఏళ్లు పంట పండింది. పంట పండని సమయంలో ఇన్సూరెన్స్ వచ్చింది. కానీ ఇప్పుడు వాతావరణ బీమా పేరుతో మండలం యూనిట్‌గా చేసి ఇన్సూరెన్స్ ఇవ్వడం లేదమ్మా’ అని శంకర్ వాపోయారు.

రోడ్డు వేయించండమ్మా...

మామూలుగా అయితే రోడ్లు వేయించాలని, కుళాయిలు ఇప్పించాలని ప్రజలు ప్రజా ప్రతినిధుల్ని, అధికార పార్టీ నేతల్ని అడుగుతారు. ఐతే ప్రభుత్వం తమను పట్టించుకోవట్లేదన్న ఉద్దేశంతో ఉన్న ప్రజలు.. పాదయాత్రలో తమ ఊరికి వస్తున్న షర్మిలకు తమ సమస్యలు ఏకరువు పెడుతున్నా రు. గురువారం ఉదయం ముద్దలాపురం సమీపంలో గొటుకూరుకు చెందిన వికలాంగుడు హరినాథ్‌రెడ్డి, అదే గ్రామానికి చెందిన ఆరోగ్యశ్రీ లబ్ధిదారుడు గొనంకి లక్ష్మయ్య రోడ్డు పక్కన కూర్చుని షర్మిల రాకకోసం ఎదురుచూస్తూ కనిపించారు. వారి వద్దకు షర్మిల రాగానే ‘నిన్న కలవాలనుకున్నా సాధ్యపడలేదమ్మా.. అందుకే ఇక్కడ కూర్చున్నాం. మా ఊరు వద్ద రోడ్డు గతుకులుగా ఉండడంతో రోడ్డు ప్రమాదం జరిగి నా కాలు పూర్తిగా విరిగిపోయింది. దయచేసి మా ఊరికి రోడ్డు వేయించండమ్మా’ అని హరినాథ్‌రెడ్డి మొరపెట్టుకున్నారు. రాజన్న రాజ్యంలో మీ కోరికలన్నీ నెరవేరతాయని షర్మిల భరోసా ఇచ్చారు. లక్ష్మయ్య మాట్లాడుతూ.. వైఎస్ తనకు చేసిన మేలుకు కృతజ్ఞతలు తెలుపుకోవడానికిఇక్కడిదాకా వచ్చానన్నారు. ‘నాకు గుండె ఆపరేషన్ అయ్యింది. కానీ మళ్లీ చేయాల్సి వచ్చింది. అప్పుడు వైఎస్ తెచ్చిన ఆరోగ్యశ్రీ నాకు వరమైంది. 2 లక్షలతో మళ్లీ ఆపరేషన్ చేయించారు’ అని అన్నారు.

గొర్రె చనిపోతే దిక్కులేదు..

మార్గం మధ్యలో జల్లిపల్లికి చెందిన గొర్రెల కాపరులు ఇటుకలప్ప, పల్లెప్ప గొర్రెలు కాస్తుండగా షర్మిల వారి వద్దకు వెళ్లి వారితో ముచ్చటించారు. వారి మధ్య సంభాషణ సాగిందిలా..
షర్మిల : ఏమన్నా.. బతుకుదెరువు ఎలా ఉంది?
కాపరి: మా బాధలేమని చెప్పేది.. గొర్రెలు చనిపోతే ఇన్సూరెన్స్ కూడా రావడం లేదమ్మా
ఇంతకుముందు వచ్చేదా?

ఇంతకుముందు గొర్రెకు రూ. 18 కడితే.. చనిపోయినప్పుడు రూ.1,000 వచ్చేది. ఇప్పుడు ఇవ్వడం లేదు.
ఎందుకు రావడం లేదు?

ఏమో అమ్మా. అప్పుడంటే రాజశేఖరరెడ్డి ఉన్నప్పుడు మాబోటివాళ్లను పట్టించుకున్నారు. ఇప్పుడెవరు పట్టించుకుంటారు? బస్సు కింద పడి 180 గొర్రెలు చనిపోయాయి. కానీ ఒక్కదానికీ పరిహారం రాలేదు. గొర్రెలకేం తెలుసు. అవి ఒక్కటి పోయి రైలు కిందపడితే.. అన్నీ వెళ్లి పడతాయి.

పశువులకు నీళ్లు, మేత ఉన్నాయా?

కాలువ నీళ్లు రావడం లేదట. అప్పటి నుంచి ఎక్కడా నీళ్లు దొరకడం లేదు. ఈ ప్రాంతంలో కురుమలు ఎక్కువ. గొర్రెలకు నీళ్లు లేవు. అప్పుడప్పుడు పడే చినుకులకు ఈసారి ఇక్కడ మేత దొరుకుతోంది. కానీ మేత దొరకనప్పుడు ఒక్కోసారి వందల కిలోమీటర్ల దూరం అలా మేపుకొంటూ వలస వెళ్లాల్సిందే. చెరువులు నింపితే మాకు కొద్దిగా ప్రయోజనం. ఇప్పటికే తాగునీళ్లు లేక జనం అల్లాడిపోతున్నారు.
జగనన్న సీఎం అయ్యాక మళ్లీ రాజన్న లాగే పీఏబీఆర్‌కు 10 టీఎంసీల నీటిని తెస్తాడు. ధైర్యంగా ఉండండన్నా..

వర్షంలోనే పాదయాత్ర..

గురువారం పాదయాత్ర ఉదయం వర్షం కారణంగా 11 గంటలకు ప్రారంభమైంది. వర్షం ఆగకపోవడంతో అదే వర్షంలో పాదయాత్ర కొనసాగించారు. మధ్యాహ్నం వరకు జల్లులు కురుస్తూనే ఉన్నాయి.. తిరిగి సాయంత్రం కొద్దిసేపు వర్షం కురిసినా.. షర్మిల ఆగకుండా యాత్ర చేశారు. గురువారం మొత్తం షర్మిల 13 కిలోమీటర్ల మేర నడిచి రాత్రి 7.30కు భం భం స్వామి గుట్ట వద్ద టెంట్‌లో బసచేశారు. దీతో ఇప్పటివరకు పాదయాత్ర 201.30 కిలోమీటర్లు పూర్తయింది. గురువారం పాదయాత్రలో ఎమ్మెల్యేలు శోభానాగిరెడ్డి, కాపు రాంచంద్రారెడ్డి, గురునాథరెడ్డి, ఎన్టీఆర్ సతీమణి లక్ష్మీపార్వతి, వైఎస్సార్ పార్టీ నేతలు వైవీ సుబ్బారెడ్డి, ఉరవకొండ పార్టీ ఇన్‌చార్జి వై.విశ్వేశ్వర్‌రెడ్డి, మాజీ ఎమ్మెల్యే ప్రసాదరాజు, కొల్లి నిర్మల కుమారి, వాసిరెడ్డి పద్మ, కోటంరెడ్డి శ్రీధర్‌రెడ్డి, కాపు భారతి తదితరులు పాల్గొన్నారు.

అబద్ధాల చంద్రబాబు

* షర్మిల ‘మరో ప్రజాప్రస్థానం’ 
* బుధవారం యాత్ర ముగిసేనాటికి.. రోజులు: 14, కిలోమీటర్లు: 188.30
* బాబు హయాంలో గ్యాస్ ధర పెరగలేదట! 
* ఫీజుల పథకం, ఆరోగ్యశ్రీ ఆయన ఆలోచనలేనట!
* ఈ ప్రభుత్వం అన్ని విధాలుగా విఫలమైంది
* దాన్ని నిలదీయాల్సిన చంద్రబాబు.. సర్కారుతోనే కుమ్మక్కయ్యారు
* 14వ రోజు వర్షంలోనూ ఆగని షర్మిల.. 3 కి.మీ. మేర తడుస్తూనే యాత్ర 

‘మరో ప్రజాప్రస్థానం’ నుంచి ‘న్యూస్‌లైన్’ ప్రత్యేక ప్రతినిధి: అధికార కాంగ్రెస్ పార్టీతో కుమ్మక్కయిన టీడీపీ అధినేత చంద్రబాబు నాయుడు తన పాదయాత్రలో అబద్ధాలు ప్రచారం చేస్తున్నారని వైఎస్సార్ కాంగ్రెస్ పార్టీ అధ్యక్షుడు వైఎస్ జగన్ చెల్లెలు షర్మిల విమర్శించారు. ‘‘ప్రజలకు మేలు చేయడంలో, వారి సమస్యలు పరిష్కరించడంలో ప్రభుత్వం అన్ని విధాలుగా ఘోరంగా విఫలమైంది. తాగునీరు, సాగునీరు, కరెంటు ఇవ్వడంలోనూ, ఫీజు రీయింబర్స్‌మెంట్ చెల్లించడంలోనూ, నిరుపేదల ఆరోగ్యం పరిరక్షించడంలోనూ విఫలమైంది. నిలదీయాల్సిన ప్రధాన ప్రతిపక్షం టీడీపీ.. ఆ సర్కారుకే కొమ్ముకాస్తోంది. ఇది చాలదన్నట్లు ఇప్పుడు చంద్రబాబు పాదయాత్రలో కొత్తగా అబద్ధాలు వల్లె వేస్తున్నారు. 

తన హయాంలో గ్యాస్ ధర పెరగలేదట. ఫీజు రీయింబర్స్‌మెంట్, ఆరోగ్యశ్రీ తన ఆలోచనేనట. నిస్సిగ్గుగా అబద్ధాలు ఆడుతున్నారాయన’’ అని షర్మిల మండిపడ్డారు. ‘‘కాంగ్రెస్, టీడీపీ కలిసి నీచమైన కుమ్మక్కు రాజకీయాలకు పాల్పడుతున్నాయి. ఇంతటి అన్యాయం, ఘోరం, నీచమైన రాజకీయాలు మరెక్కడా లేనేలేవు. ఇంతటి కుట్రలు, కుతంత్రాలు ఇంతకుముందెన్నడూ లేవు. వారంతా పెద్ద మనుషులే. కానీ చిన్న మనసులు..’’ అని విమర్శించారు. ‘మరో ప్రజా ప్రస్థానం’ పాదయాత్ర 14వ రోజు బుధవారం అనంతపురం జిల్లా కూడేరులో జరిగిన భారీ బహిరంగ సభలో ఆమె మాట్లాడుతూ ఈ వ్యాఖ్యలు చేశారు. ప్రజా సమస్యలు పట్టని ప్రభుత్వ వైఖరికి, దానితోనే కుమ్మక్కయిన టీడీపీ వైఖరికి నిరసనగా వైఎస్ జగన్ తరఫున ఈ యాత్ర చేపట్టిన షర్మిల బుధవారం వర్షంలోనూ ఆగకుండా పాదయాత్ర చేశారు.

పెట్టుబడి రూ. 50 వేలు.. పంట రూ. 5 వేలు: ఉదయం 10.30కు కమ్మూరు క్రాస్‌రోడ్డు నుంచి బయలుదేరిన షర్మిల అరవకూరు సమీపంలో ఎండిపోయిన ఓ వేరుశనగ పంటను పరిశీలించారు. అరవకూరుకు చెందిన నారాయణ అనే ఆ రైతు తాను ఐదెకరాల్లో రూ. 50 వేల పెట్టుబడితో వేరుశనగ పంట వేయగా.. చెట్టుకు ఒకటో రెండో కాయలు మాత్రమే కాశాయని, ఇప్పటికే ఆకు ఎండి రాలిపోతోందని వాపోయారు. పంటకు మొత్తం రూ. 5 వేలకు మించి వచ్చే పరిస్థితి లేదని, చేను తెంపేందుకే ఇవి సరిపోవని ఆవేదన వ్యక్తంచేశారు. ఈ పంట ద్వారా రూ. 45 వేలు నష్టపోయినట్టేనని కన్నీటి పర్యంతమయ్యారు.

నష్టపరిహారం కూడా వచ్చే అవకాశం లేదని తోటి రైతులు అంటున్నారని, వాతావరణ బీమా అంటూ ఎంత ప్రీమియం కడితే అంతే పరిహారం వస్తుందని చెబుతున్నారని ఆందోళన వ్యక్తంచేశారు. దీనికి షర్మిల స్పందిస్తూ ‘చంద్రబాబు ప్రభుత్వంలోనూ ఇదే జరిగింది. ఆయన మైండ్‌సెట్‌లోకే ప్రజలు రావాలన్నారుగానీ ఆయన మాత్రం ప్రజల అవసరాలను గుర్తించలేదు. ఇప్పుడు ఈ ప్రభుత్వం కూడా పరిహారం చెల్లించే ఉద్దేశం లేకనే ఇలా నడచుకుంటోంది. రాజన్న ఉన్నప్పుడు గ్రామం యూనిట్‌గా దాదాపు 95 శాతం వరకు పరిహారం ఇచ్చారు.. పెన్నా రిజర్వాయర్‌కు నీళ్లు తెచ్చి చెరువులు నింపి తద్వారా గ్రామాలకు సాగునీటి కొరతను తీర్చారు..’ అని గుర్తుచేశారు. ఉదయం 11.30కు అరవకూరు చేరుకోగానే మహిళలు షర్మిలకు స్వాగతం పలికి అక్కడే కూర్చుని తమ సమస్యలు విన్నవించారు.

రూ. 20 వేల కరెంటు బిల్లు:
కూడేరు సమీపంలో గాంగ్యా నాయక్ అనే రైతుకు చెందిన చీనీ తోటను పరిశీలించిన షర్మిలతో ఆ రైతు మాట్లాడుతూ.. ఉచిత విద్యుత్తు అంటూనే రూ. 20 వేల కరెంటు బిల్లు కట్టాలని తనను వేధిస్తున్నారని, బుధవారం ఉద యం కూడా అధికారులు తన దగ్గరికి వచ్చారని వివరించారు. చీనీ(బత్తాయి)కి ధర లేదని, గిట్టుబాటు కావడం లేదని వాపోయారు. ‘సర్‌చార్జీలు వేసి ఉండొచ్చు. 

ఈ ప్రభుత్వం రైతులను దెబ్బతీసే చర్యలే తప్ప వారికి ప్రయోజనం కలిగించే చర్యలు చేపట్టడం లేదు. జగనన్న రాగానే పంటల గిట్టుబాటుకు రూ. 3 వేల కోట్ల స్థిరీకరణ నిధి ఏర్పాటు చేస్తారు’ అని షర్మిల భరోసా ఇచ్చి ముందుకు కదిలారు. సాయంత్రం 5.10కి పాదయాత్ర కూడేరుకు చేరుకునే సరికి అక్కడ బహిరంగ సభకు భారీగా జనం తరలివచ్చారు. 

కిక్కిరిసిపోయిన జనం మధ్య షర్మిల మాట్లాడుతూ అధికార, ప్రతిపక్షాల తీరును దునుమాడారు. బుధవారం నాటి పాదయాత్రలో ఎంపీ మేకపాటి రాజమోహన్‌రెడ్డి, ఎమ్మెల్యేలు శోభానాగిరెడ్డి, గురునాథరెడ్డి, కాపు రాంచంద్రారెడ్డి, ఎమ్మెల్సీ నారాయణరెడ్డి, మాజీ శాసన సభ్యుడు ప్రసాదరాజు, పార్టీ సీజీసీ సభ్యుడు వైవీ సుబ్బారెడ్డి, పార్టీ నేతలు వాసిరెడ్డి పద్మ, కొల్లి నిర్మలాకుమారి, కాపు భారతి తదితరులు పాల్గొన్నారు.

బుధవారం యాత్ర 12 కిలోమీటర్ల మేర సాగింది. తుపాను నేపథ్యంలో ఉదయం పూట తుంపర్లతో చిరుజల్లులు కురవగా.. సాయంత్రం 6 నుంచి రాత్రి 7 గంటల వరకు ఈదురుగాలులతో కూడిన ఒక మోస్తరు వర్షం కురిసింది. వర్షంలోనే షర్మిల 3 కిలోమీటర్ల వరకు పాదయాత్ర కొనసాగించి.. రాత్రి 7 గంటలకు ముద్దలాపురం సమీపంలో రోడ్డు పక్కన టెంట్‌లోనే బసచేశారు. బుధవారం నాటికి పాదయాత్ర మొత్తం 188.3 కిలోమీటర్లు పూర్తిచేసుకుంది.

ఏదీ అభయహస్తం?

మరో ప్రజాప్రస్థానం’లో షర్మిలకు జనం మొర షర్మిల 
కాంగ్రెస్సోళ్లు వడ్డీ లేని రుణాలన్నారు..రెండు రూపాయల వడ్డీ గుంజుతున్నారు
బాబు ఆనాడు రూ. 15 వేల లోనిచ్చాడు..
అధికారులు పుస్తెలమ్మి కట్టేవరకు వెంటపడ్డారు
వీళ్లు ఇప్పుడిచ్చే హామీలు నమ్మలేం
వైఎస్ వెళ్లిపోయాక మా గోడు వినే నాథుడే లేకుండాపోయాడు
‘మరో ప్రజాప్రస్థానం’మంగళవారం యాత్ర ముగిసేనాటికి..రోజులు: 13, కిలోమీటర్లు: 176.30

 ‘‘చంద్రబాబు నాయుడు ఊళ్ల మీద పడ్డాడు ఎందుకు? ఆయన ఉన్నప్పుడు నాకు చేనేత సొసైటీ ద్వారా రూ. 15 వేలు అప్పు ఇచ్చారు. కట్టలేకపోతే మా ఇంటికొచ్చి వేరుశనగ మూటలన్నీ బయటపడేశారు. అవి అమ్మినా అప్పు తీరని పరిస్థితి. చేసేది లేక పుస్తెలమ్మి ఆ అప్పు కట్టాను. ఇప్పుడు ఆయనే వడ్డీ మాఫీ, రుణాల మాఫీ అంటున్నాడు. నాడు ఆయనను గెలిపిస్తే ఒక్క సాయమూ చేయలేదు. ఇప్పుడు ఆయన మాటలు నమ్మలేం. రాజశేఖరరెడ్డి హయాంలో మాకు లోన్లు మాఫీ అయితే కాలేదు గానీ ఒకసారి రూ. 18 వేలు ఇన్సూరెన్స్ వచ్చింది’’
- చంద్రబాబుపై లక్ష్మి అనే మహిళ మండిపాటు

‘మేమందరం చేనేత కార్మికులమే. రాజశేఖరరెడ్డి ఉన్నప్పుడు కొంతమంది పెన్షన్ల కోసం పేర్లు నమోదు చేసుకున్నారు. ఆయన వెళ్లిపోయాక అభయహస్తం అన్న మాటే మరిచిపోయారు. అప్పుడు నమోదు చేసుకున్న పేర్లు కూడా ఇప్పుడు తీసేస్తున్నారు. ఇల్లు ఇస్తే పెన్షన్ ఇవ్వరట. మాకు 60 ఏళ్లు దాటాక పెన్షన్ వచ్చేలా రాజశేఖరరెడ్డి ఒక అవకాశం కల్పిస్తే ఈ ప్రభుత్వం చిన్నచూపు చూస్తోంది..’ 
- మరో మహిళ ఆవేదన

..ఇవీ అధికార, ప్రతిపక్షాలపై పేదింటిఆడపడుచుల అభిప్రాయాలు. మంగళవారం అనంతపురం నగర శివార్లలోని సిండికేట్‌నగర్‌లో వైఎస్సార్ కాంగ్రెస్ నాయకురాలు షర్మిల పాదయాత్ర సందర్భంగా మహిళా సంఘాలన్నీ ఒక్క చోట చేరి ఆమెకు స్వాగతం పలికి తమ సమస్యలు ఏకరువు పెట్టాయి. పై అభిప్రాయాలన్నీ ఆ సందర్భంగా వారు చెప్పినవే. తమకు పెద్ద దిక్కులాంటి మహానేత వైఎస్ రాజశేఖరరెడ్డి చనిపోయాక, తమను పట్టించుకునే నాథుడే కరువయ్యాడని మహిళలంతా ఆవేదన వ్యక్తంచేశారు. ‘మగ్గాలు గిట్టుబాటు కాక రెండు నెలలుగా ఖాళీగా ఉన్నాం. కనీసం పిల్లలను బడికి పంపేటప్పుడు రూ. 2 ఇచ్చే స్తోమత కూడా లేదు.. మిద్దెలు, కార్లు ఉన్నోళ్లనే ఈప్రభుత్వం పట్టించుకుంటోంది..’ అని మరో మహిళ కన్నీళ్లు పెట్టుకున్నారు. ప్రజా సమస్యలు పట్టని ప్రభుత్వ వైఖరికి, ఆ సర్కారును అవిశ్వాసంతో కూలదోయకుండా దానితోనే కుమ్మక్కైన టీడీపీ రాజకీయాలకు నిరసనగా చేపట్టిన ‘మరో ప్రజాప్రస్థానం’ 13వ రోజు మంగళవారం షర్మిలకు సిండికేట్‌నగర్‌తోపాటు అడుగడుగునా ప్రజలిలా తమ గోడు వెళ్లబుచ్చుకున్నారు.

2 రూపాయల వడ్డీ కడుతున్నాం..

సాయంత్రం బ్రాహ్మణపల్లి క్రాస్‌రోడ్డులో కూడా మహిళలు పెద్ద సంఖ్యలో హాజరై షర్మిలకు స్వాగతం పలికి తమ కష్టనష్టాలను వివరించారు. ‘రెండేళ్లుగా తాగునీరు లేదు. కరెంటు రెండు మూడు గంటలు కూడా రావడం లేదు. పంటలు లేవు. పావలా వడ్డీ అంటారు.. కానీ రెండు రూపాయల వడ్డీ కట్టించుకుంటున్నారు. ఇదేమని అడిగితే పావలా వడ్డీ అని ఎవరు చెప్పారమ్మా అని ఒకరంటారు. వెనక్కి వ స్తుందిలే అని ఇంకొకరంటారు. పావలా వడ్డీ అమల్లో లేదని ఇంకొకరంటారు’ అని ఆవేదన వ్యక్తంచేశారు.

ఉరవకొండలోకి యాత్ర..

అనంతపురం నగరశివారులో కళ్యాణదుర్గం బైపాస్‌రోడ్డులో యాత్ర ప్రారంభమవగా.. శివారు కాలనీల ప్రజలు భారీ సంఖ్యలో షర్మిల వెంట కదం కలిపారు. కేకే కాలనీ, సిండికేట్‌నగర్‌లో భారీసంఖ్యలో మహిళలు తరలివచ్చి ఘనస్వాగతం పలికారు. మధ్యాహ్నం ఒంటి గంటకు రాచానపల్లి సమీపంలో భోజన విరామానికి ఆమె ఆగారు. తిరిగి నాలుగు గంటలకు పాదయాత్ర ప్రారంభమవగా స్థానికులు షర్మిలకు పలు వినతిపత్రాలు అందజేశారు. లెప్రసీకాలనీ వద్ద ఉరవకొండ నియోజకవర్గంలోకి యాత్ర ప్రవేశించింది. రాత్రి 7.15కు కమ్మూరు క్రాస్‌రోడ్డుకు చేరుకున్న షర్మిల అక్కడ బస చేశారు. షర్మిల మంగళవారం మొత్తం 12.9 కిలోమీటర్లు నడిచారు. 

మహిళలంటే చిన్నచూపు: షర్మిల

సిండికేట్‌నగర్‌లో, బ్రాహ్మణపల్లిలో మహిళల సమస్యలు షర్మిల విని మాట్లాడుతూ.. ‘ఈ ప్రభుత్వానికి మహిళలంటే చిన్నచూపు. రాజన్న ఉన్నప్పుడు సాగుకు ఉచితంగా 7 గంటల కరెంటు ఇస్తే.. వీళ్లు రెండు మూడు గంటలు కరెంటు ఇచ్చేందుకు ఆపసోపాలు పడుతున్నారు. రాజన్న ఉన్నప్పుడు గ్యాస్‌పై రూ.305 కంటే ఒక్క పైసా పెంచలేదు. ఇప్పుడు నెలకో సిలిండర్ వాడేవాళ్ల పరిస్థితి ఘోరం. సగటున రూ. 950 వెచ్చించాల్సిన పరిస్థితి. వడ్డీలేని రుణాలని చెబుతూనే రూ. 2 వడ్డీ వసూలు చేస్తున్నారట. పక్క గ్రామాల్లో కూడా మహిళలు ఈ విషయం చెప్పారు. రాజన్న ప్రతీ పథకం పూర్తిగా, అర్హులైన ప్రతి ఒక్కరికీ అందేలా శ్రద్ధ తీసుకున్నాడు’’ అని అన్నారు.

సొంతింటికి వచ్చినట్టుంది

అనంతలో టీడీపీకి షాక్: భారీగా వైస్సార్సీపీలోకి నేతలు

‘ఇన్నాళ్లూ అద్దె ఇంట్లో ఉన్న తాను ఇప్పుడు సొంత ఇంటికి వచ్చినంత ఆనందంగా ఉంది’అని అనంతపురంలో సోమవారం షర్మిల సమక్షంలో వైఎస్సార్ సీపీలో చేరిన టీడీపీ నాయకుడు తరిమెల శరత్‌చంద్రారెడ్డి వ్యాఖ్యానించారు. తెలుగుదేశం పార్టీ రైతు విభాగం రాష్ట్ర ఉపాధ్యక్షుడిగా, శింగనమల మండలం మాజీ జెడ్పీటీసీ సభ్యుడిగా పని చేసిన తరిమెల. తో పాటు మాజీ జెడ్పీటీసీ సభ్యుడు రామకృష్ణ తదితరులు వైఎస్సార్ కాంగ్రెస్ పార్టీలో చేరారు. షర్మిల చేపట్టిన ‘మరో ప్రజా ప్రస్థానం’ పాదయాత్ర సందర్భంగా వైఎస్సార్ సర్కిల్‌లో ఏర్పాటు చేసిన బహిరంగ సభలో వారికి పార్టీ జిల్లా కన్వీనర్ శంకరనారాయణ కండువా వేసి పార్టీలోకి ఆహ్వానించారు. 

ఈ సందర్భంగా తరిమెల మాట్లాడుతూ మహానేత వైఎస్ రాజశేఖరరెడ్డి చేసిన సంక్షేమ కార్యక్రమాలు కొనసాగించే సత్తా కేవలం వైఎస్ జగన్‌మోహన్‌రెడ్డికి మాత్రమే ఉందని ప్రగాఢంగా విశ్వసిస్తున్నామన్నారు. ఇదే సభలో పుట్టపర్తి నియోజకవర్గం నాయకుడు డాక్టర్ సి.సోమశేఖర్‌రెడ్డి ఆధ్వర్యంలో కొత్తచెరువు మండలానికి చెందిన ఇద్దరు టీడీపీ మాజీ ఎంపీటీసీ సభ్యులు, మరో ఇద్దరు కాంగ్రెస్ పార్టీ మాజీ సర్పంచులు, పలువురు కాంగ్రెస్, టీడీపీ కార్యకర్తలు, నగరానికి చెందిన టీడీపీ జిల్లా మహిళా ఉపాధ్యక్షురాలు పి.నూర్‌జాన్, మరికొందరు కార్యకర్తలు పార్టీలో చేరారు. ఈ సభలో నెల్లూరు ఎంపీ మేకపాటి రాజమోహన్‌రెడ్డి, అనంతపురం ఎమ్మెల్యే గురునాథరెడ్డి, రాయదుర్గం ఎమ్మెల్యే కాపు రామచంద్రారెడ్డి తదితరులు పాల్గొన్నారు.

షర్మిల వెంట ‘అనంత’ జనవాహిని

12వ రోజు పాదయాత్రలో భాగంగా షర్మిల అనంతపురం ఎస్కేయూ నుంచి సోమవారం ఉదయం పది గంటలకు పాదయాత్రకు బయలుదేరారు. ఉదయం నుంచే అనంతపురం ప్రజలు పెద్ద ఎత్తున ఆమె వెన్నంటి ఉన్నారు. వేలాది మంది ఆమెతో కదం కలిపారు. వీధులన్నీ పోటెత్తగా షర్మిల ముందుకు సాగారు. మార్గమధ్యలో చియ్యేడుకు చెందిన రైతులు తాము కూలీలుగా మారిన పరిస్థితిని ఆమె దృష్టికి తెచ్చారు. నీరు లేక, కరెంటు లేక, పంటలు పండక, నష్టపరిహారం రాక ఈ దుస్థితి నెలకొందని ఆవేదన వ్యక్తంచేశారు. అనంతరం 11.20కి విన్సెంట్ పాఠశాలలో పిల్లలకు అభివాదం తెలిపి పాదయాత్ర కొనసాగించారు. తర్వాత ఇటుక బట్టీ కార్మికులతో మాట్లాడారు. షర్మిల ఇటుక మూసలో మట్టి పోసి రెండు మూడు ఇటుకలు తయారు చేశారు. మధ్యాహ్నం 12.15కు ఆర్డీటీ ఆసుపత్రి సమీపంలో భోజన విరామానికి ఆగారు. తిరిగి 3.30కు పాదయాత్రకు బయలుదేరారు. 4.45కు వాల్మీకి విగ్రహానికి హారతి ఇచ్చి, అక్కడ్నుంచి బహిరంగ సభ ప్రాంతమైన సప్తగిరి సెంటర్‌కు సాయంత్రం 5.15కు చేరుకున్నారు. అనంతపురం నగరమంతా అక్కడికి తరలిరావడంతో మెయిన్ రోడ్డు అంతా ట్రాఫిక్ జామైంది. యువతీయువకులు పెద్ద సంఖ్యలో తరలివచ్చారు. మైనారిటీ సోదరులు బంతిపూల తివాచీ పరిచి స్వాగతం పలికారు. రాత్రి 7.35 గంటలకు కల్యాణదుర్గం బైపాస్ రోడ్డులో రాత్రి బసకు చేరుకున్నారు. పాదయాత్రలో ఎంపీ మేకపాటి రాజమోహన్‌రెడ్డి, పార్టీ ఎమ్మెల్యేలు గురునాథరెడ్డి, కాపు రాంచంద్రారెడ్డి, ఎమ్మెల్సీ డి.నారాయణరెడ్డి పాల్గొన్నారు.

జగనన్నతోనే రైతన్న రాజ్యం

కోటి ఎకరాలకు నీరివ్వాలన్న వైఎస్ కలను సాకారం చేస్తాడు
వ్యవసాయానికి ప్రత్యేక బడ్జెట్ ఉంటుంది
రైతన్న గిట్టుబాటు ధరకోసం రూ. 3 వేల కోట్లతో స్థిరీకరణ నిధి
రాజన్నకు, జగనన్నకు ఉన్నది.. చంద్రబాబుకు లేనిది విశ్వసనీయత
చంద్రబాబుకు ప్రభుత్వాన్ని దించే శక్తి ఉన్నా.. ఎందుకు అవిశ్వాసం పెట్టడం లేదు?
షర్మిల ‘మరో ప్రజాప్రస్థానం’ సోమవారం యాత్ర ముగిసేనాటికి..రోజులు: 12, కిలోమీటర్లు: 163.4

 ‘‘ఒకరోజు వస్తుంది. ఎలాగైతే ఉదయించే సూర్యుడిని ఆపలేమో జగనన్నను కూడా ఆపలేరు. ఆరోజు జగనన్న బయటకు వస్తాడు. మనందరినీ రాజన్న రాజ్యం దిశగా తీసుకెళతాడు. రైతన్న రాజ్యం స్థాపిస్తాడు..’’ అని వైఎస్సార్ కాంగ్రెస్ అధ్యక్షుడు వైఎస్ జగన్‌మోహన్‌రెడ్డి చెల్లెలు షర్మిల ఉద్ఘాటించారు. కోటి ఎకరాలకు నీరివ్వాలన్న దివంగత వైఎస్ రాజశేఖరరెడ్డి కలను జగనన్న సాకారం చేస్తాడని చెప్పారు. వ్యవసాయానికి ప్రత్యేక బడ్జెట్ పెట్టి, రైతన్న గిట్టుబాటు ధరకే తమ ఉత్పత్తులను అమ్ముకోవడానికి వీలుగా రూ.3 వేల కోట్లతో ధరల స్థిరీకరణ నిధిని ఏర్పాటు చేస్తాడని పేర్కొన్నారు. రైతులకు, మహిళలకు వడ్డీలేని రుణాలను అందిస్తాడని అన్నారు. 

మరో ప్రజాప్రస్థానం పాదయాత్రలో భాగంగా 12వ రోజు సోమవారం అనంతపురంలోని సప్తగిరి సర్కిల్‌లో నిర్వహించిన బహిరంగ సభలో ఆమె ప్రసంగించారు. ‘‘జగనన్న అధికారంలోకి వస్తే పెద్ద చదువులకు ఇక ఆటంకం ఉండదు. ప్రతి మహిళా తన పిల్లలను బడికి పంపేందుకు వీలుగా ‘అమ్మ ఒడి’ ద్వారా తల్లి బ్యాంకు ఖాతాలో పదో తరగతి వరకు రూ.500, ఇంటరైతే రూ.700, డిగ్రీ అయితే రూ.1,000 వేస్తాడు. వృద్ధులకు, వితంతువులకు రూ.700, వికలాంగులకు రూ.1,000 పింఛన్ ఇస్తాడు. రాజన్న చెప్పినవీ చేశాడూ.. చెప్పనివీ చేశాడు. జగనన్న కూడా మాట మీద నిలబడే మనిషి. చెప్పినవే కాకుండా ప్రజల అవసరాలను గమనించి అన్నీ సమకూరుస్తాడు. మైనారిటీలకు వీలైనంత ప్రయోజనం కల్పించాలన్నదే వైఎస్ లక్ష్యం. అదే లక్ష్యంతో జగనన్న పనిచేస్తాడు..’’ అని చెప్పారు.

చంద్రబాబుకు లేనిది.. విశ్వసనీయత!

రాజన్న, జగనన్నలకు ఉన్నది.. టీడీపీ అధినేత చంద్రబాబుకు లేనిది విశ్వసనీయత, మాటమీద నిలబడే నైజం అని షర్మిల అన్నారు. ‘‘చంద్రబాబుకు అసలు పాదయాత్ర చేయాల్సిన అవసరమే లేదు. ఈ అసమర్థ కాంగ్రెస్ ప్రభుత్వాన్ని దించే శక్తి టీడీపీకి ఉంది. వైఎస్సార్‌సీపీ కూడా మద్దతు ఇస్తామంటున్నా చంద్రబాబు అవిశ్వాసం పెట్టరట. ప్రజాస్వామ్య స్ఫూర్తికి విరుద్ధంగా ప్రభుత్వం, ప్రధాన ప్రతిపక్షం ఎమ్మెల్యే, ఎమ్మెల్సీ ఎన్నికల్లో కుమ్మక్కయ్యాయి. సీబీఐని వాడుకుని విచారణ పేరుతో జగనన్నను బందీని చేశారు. వారి లక్ష్యం ఒక్కటే. జగనన్న బయటే ఉంటే ప్రతి సమస్యకూ స్పందిస్తాడు. రేయనక పగలనక మీ మధ్య ఉంటాడు. మీ ప్రేమ, ఆప్యాయతలు పొందుతాడు. కాంగ్రెస్, టీడీపీలకు మనుగడ ఉండదు. ఇలాగైతే తమ దుకాణాలు మూసుకోవాల్సి వస్తుందని వారు జగనన్నను దోషిగా చిత్రీకరించారు. జైల్లో పెట్టారు. కానీ దేవుడున్నాడు. దేవుడున్నాడన్నది ఎంత నిజమో మంచివారి పక్షాన నిలబడతాడన్నదీ అంతే నిజం. అధర్మానికి ఆయుష్షు తక్కువ’’ అన్నారు.

సొమ్మొకరిది.. సోకొకరిది అన్నట్టుగా ఉంది..

‘‘కరువు జిల్లా అని అనంతపురంపై ప్రత్యేక శ్రద్ధతో రాజన్న హంద్రీనీవా సుజల స్రవంతి పథకాన్ని 4 వేల కోట్ల రూపాయలతో చేపట్టి 95% పనులు పూర్తిచేస్తే.. ఈ మూడేళ్లలో ఈ ప్రభుత్వం 5% కూడా పూర్తిచేయలేకపోయింది. ఇంకో రూ.45 కోట్లు వెచ్చిస్తే మొదటి విడత పనులు పూర్తవుతాయి. ఈ పనుల కోసం మంత్రి రఘువీరారెడ్డి పాదయాత్ర చేసి పూర్తి చేస్తారట. సొమ్మొకరిది.. సోకొకరిది అన్న చందంగా ఉంది ఆయన కథ. పోనీలెండి. ఆ పనులైనా పూర్తిచేస్తే సంతోషమే..’’ అని షర్మిల విమర్శించారు.

కేంద్రంలో వైఎస్సార్‌సీపీ అతిపెద్ద మూడో పార్టీ: మేకపాటి

బహిరంగ సభలో లోక్‌సభ సభ్యుడు మేకపాటి రాజమోహన్‌రెడ్డి మాట్లాడుతూ.. వైఎస్ కారణజన్ముడని పేర్కొన్నారు. ఢిల్లీ పెద్దలు రుద్దే నేతలు మనల్ని పాలించడం సరికాదన్నారు. డిసెంబర్‌లోగా జగన్ బయటికి వస్తాడని ఆశాభావం వ్యక్తంచేశారు. ఎప్పుడు ఎన్నికలొచ్చినా వైఎస్సార్‌సీపీ ప్రభుత్వాన్ని ఏర్పాటు చేయడం ఖాయమని, ఢిల్లీలో కూడా కాంగ్రెస్, బీజేపీల తరువాత 35 ఎంపీ స్థానాలతో అతి పెద్ద పార్టీ వైఎస్సార్‌సీపీ అవుతుందని ధీమా వ్యక్తం చేశారు. సప్తగిరి సర్కిల్‌లో జరిగిన సభలో తెలుగుదేశం అనుబంధ తెలుగు రైతు రాష్ట్ర ఉపాధ్యక్షుడు, మాజీ రాష్ట్రపతి నీలం సంజీవరెడ్డికి సమీప బంధువు తరిమెల శరత్‌చంద్రారెడ్డి షర్మిల సమక్షంలో వైఎస్సార్ కాంగ్రెస్‌లో చేరారు.